Rritur në Durrës aty ku kreva arsimimin 8-vjecar dhe të mesëm si dhe ku fillova rrugën e sportit të Atletikës.

 

Në moshën 14-vjecare për herë të parë garova në sportin e Atletikës dhe nga ai moment nuk u ndala më.

 

Fillimisht më sugjeroi burri i tezes i cili në atë kohë ishte trajner tek shkolla e mesme “Mjeshtëria Sportive Durrës” ku ishte pikërisht dhe shkolla e mesne që unë ndoqa për 4 vite.

Gara ime e parë ka qenë Krosi Kombetar për të reja i cili u mbajt tek kodrat e liqenit në Tiranë ku une u shpalla kampione për të Reja, i cili ishte dhe momenti që unë përjetova një emocion shumë të madh dhë më dha besim dhe dëshirë për ta përjetuar përsëri.

 

Me trajnerin Azbi Dauti (burri i tezes) vozhdova sportin deri në mbarimin e shkollës së mesme ku në vitin e fundit arrita rezultatet më të mira deri në atë moment në (800m: 2.13) dhe në (1500m: 4.32).

 

Në vitin 2007 u shpërngula në Tiranë për të vazhduar Universitetin e Sporteve. Po në këtë vit vazhdova stërvitjen me trajnerin tim që vazhdoj edhe në keto momente Taulant Stermasi.

Ishte pikërisht ky momenti që unë doja të provoja limitet e mia në këtë sport dhe fillova ti dedikohesha 100% si sportiste profesioniste.

 

Në vitin 2009 theva rekordin tim të parë kombëtar në garën e 800m në Salla të Mbyllura në Greqi me rezultatin 2.08.18, si dhe po këtë vit mora pjesë për herë të parë në “Kampionatin Europian të Sallave të Mbyllura në Paris”.

 

Në vitin 2010 në Team Championship në Marsa Maltë unë bashkë me ekipin kombëtar të atletikës garuma për ti dhënë sa më shumë pikë Shqiperisë në klasifikimin ekipor. Unë garova në dy disiplina, 800m dhe 1500m nga ku zura dy vende të para. Në atë garë bashkë me trajnerin vendosim se e ardhmja ime do të ishte në disiplinat 1500m dhe më lartë.